私家醫生, 中環陳創斌:
照結構週數: 21w
照結構時間: 約15分鐘
費用及取走物品: $2000, 報告, DVD, USB手指, 幾張相
公院(QE):
照結構週數: 22w5
照結構時間: 約35分鐘
費用及取走物品: 免費但沒有任何物品取走
一路見好多JM都會比較係私家醫生同公院做結構既分別, 有幸兩種服務都嘗試過, 所以寫個事後報告俾大家參考下。當我懷孕10週時去QE見助產仕已經收到結構期, 但係因為去到22W尾先做, 而萬一有事合法X產既時間係24週前, 一路都怕萬一照到有咩事唔夠時間再搵多個醫生做進一步測試, 加上自己本身有長期病, 考慮左好耐都係決定去QE做結構前, 先搵一個私家醫生做左先, 萬一有乜事都有時間抽羊水, 又或者萬一QE照得求其都唔怕BOOK唔到醫生再照。
-----------私家醫生篇------------
終於係18週時打電話去約私家醫生照結構, 但比我想像中FULL, 有幾個出名既5月都已經FULL哂, 好彩仲有一位係BK評價都好好既醫生仲有期, 所以就約左21週正日去做。去到登記左之後就填媽媽會FORM, 好多禮物拎, 未填哂已經到我入去見醫生。醫生都好詳細咁講D器官SIZE, 手指腳指, 有冇兔唇, 男定女之類, 由於佢非常熟手, 每PART都好快就睇哂, 15分鐘左右就照完, 雖然比我想像中照得快, 不過BB健康就心滿意足。
-------------公院篇--------------
接落黎QE既結構就可以當係一個DOUBLE CONFIRM, 唔駛好似第一次做咁大壓力。QE係事前幾日已經打左電話提我記得要黎照, 仲話個日會好多人, 叫我如果趕時間最好早D去登記。由於當日我要趕去一個產前實習班, 所以我同老公早左個幾鐘就去登記, 好彩係第3號飛, 但前面2號飛都照左廿幾分鐘, 之後先終於到我入房。
意想不到係QE照得比私家更詳細, 同樣一開始睇腦睇五官, 到之後數手指時BB握緊拳頭, 醫護人員話想睇埋BB手指有冇連住, 要等佢放開手先睇到, 所以照左其他部份先。但係上次係私家醫生照, BB都係握緊拳頭數齊骨頭就算, 估唔到QE會照得更加小心。
去到照心臟, 每一個部份都有講係唔係正常, 之後佢照左好耐, 但一路都冇講野, 過左陣先同我講係BB心臟見到有一點反光, 但係好細亦唔易睇到, 應該係鈣化點, 好多BB中期都會有, 但去到出世前就會消失。聽到呢到我個心真係沉左, 之前唔係話好健康咩, 事後我上網搵左好多資料, 的確台灣都有唔少BB照到有鈣化點出世前就消失, 最緊要排除左係唐BB就問題唔大, 可能因為呢個原因, 私家醫生冇特別同我講吧。
之後醫護人員再去返照手指, 但BB仲係握住拳頭, 佢話一係出去行下, 一係改日再黎睇過, 但係我唔咁想行兩次, 就同BB講叫佢幫幫手打開隻手俾我地睇下, 轉頭同佢去食大餐, 點知BB真係打開隻手俾醫護人員睇, 確定兩隻手既手指都冇連住既情況, 成個過程約35分鐘就走得, 門外已經排左長長既人龍。
-----------結論篇------------
經常係BK見到有JM講公家醫院既服務好差好求其, 的確以我自己睇長期病既經驗, 都對公家醫院(屯門醫院)印象唔係太好, 所以知道QE可以收誇區就搏一搏, 因為冇得自己選醫生, 遇到咩醫生姑娘好唔好都係睇彩數, 呢下的確係睇私家會放心好多。
幸好成個懷孕期係QE既過程好幸運, 就算11W時見血入急症, 遇到既醫生都好好人, 不斷安慰我唔駛驚, 仲好溫柔咁幫我檢查。之後OSCAR, 結構遇到既醫護人員都好專業, 令我對生產時既恐懼減少左好多。
不過公家醫院平時檢查真係太求其, 結構之後又要繼續自費去搵私家醫生定期照超聲波, 希望黎呢3-4個月順順利利, 最緊要BB健康, 心臟粒鈣化點快D消失啦!
沒有留言:
張貼留言