2011．第三新東京紅葉初盛PLUS草泥馬微笑之旅．Day 5

2011．第三新東京紅葉初盛PLUS草泥馬微笑之旅．Day 5

Day 5 新宿

最後一日，我地將於16:20乘坐CX番香港，
所以會坐12:40開既N'EX出發去機場，
時間唔多，所以今日集中係新宿活動。

經過連日黎既早起，Day 5終於可以訓到9點起身喇，
最後一輪收拾及Packing後，我地由東新宿坐JR去到新宿西口，
搵左一陣先係JR閘口搵到大型Locker，400Yen就可以放哂行李入去！

無物一身輕，即刻飛奔落小田食品場買塊大吉列豬扒食，
然後就行去思憶之橫丁附近既大黑屋，想睇下有冇平價Baby-G執，
可惜仲未開舖．．．
一邊行下行下，又去番Day 1個間夾公仔店，
點知俾我發現到重大既挫折．．．
夾公仔店竟然做緊全場100Yen！！比我地Day 1夾平左一半呀！

因為我既貪玩，而且又睇中左隻草泥馬公仔，就唱左1000yen玩喇！
今次我地醒左喇，每完一次都會搵店員黎幫手，
結果唔駛1000yen就已經夾到手，Yohohohohoho！
你地睇下呢公仔係唔係好得意，而且抱上手仲好軟好舒服架～～


夾完公仔再去番大黑屋終於都開左店，不過冇野睇得岩，
我地度下度下又黎到Keio百貨，因為仲有少少時間就行下，
發現左一個以『鯨魚』做Logo既帆船袋牌子，
用料好特別，設計亦到好靚，加上男店員努力用英文講解，
我考慮左一陣就買左個6615yen既餃子袋，
當時另一半已經有d想買個18xxxyen既大袋，不過都係忍手，
到我買完，行左上幾層佢又心掛掛，結果都係買左XD

拎左貨之後時間已經唔多，不過都趕去搞退稅，
點知因為我地分開左單購買，只有另一半個件可以退．．．嗚，
好喇，真係冇時間喇，我地用盡最後二十分鐘衝番去小田食品場，
買埋是日午飯上N'ex食，呢份係另一半食既豬扒飯

 
而我緊係食壽司啦！


趕頭趕命咁，仲要行勁遠終於12:30到站口等車，
14:00鍾到達機場，原本以為過關要好耐，
結果14:20就已經KO...仲有2個鍾都唔知做咩好，
機場又唔算多野行，但我地都來回行左2~3次，
行到冇野好行又累，就去用200YEN 10分鐘既按摩機，其實都幾舒服！

好喇，上機啦～～而今次遊行亦完滿結束，多謝大家收看！

Day 4 池袋Sunshine City NAMCO 餃子博物館

Day 4 池袋Sunshine City NAMCO 餃子博物館

離開Mother Farm之後，又要經歷90分鐘既回程喇，

到達東京站時已經六點鐘，我地係東京地下街行左一陣，
不過個到特色野唔多，反而好多貴價蛋糕及和食店，
最後閒逛左鬆弛熊專門店就閃人～出發去池袋開餐喇！

就係計劃行情時，已經決定左呢日晚餐係要去Sunshine City內NAMCO既餃子博物館食，
不過由於Sunshine City遠離大街有段路程，而我又發揮迷路精神．．．
結果左搵右搵一大輪先去到Sunshine City大樓，
入到商場又再搵啊搵啊都搵唔到NAMCO係邊到，差d以為佢執左呀，
幾經辛苦行入左個後樓梯反而見到指示，
跟住行左陣終於都搵到喇！好彩未執ja，因為另一半已經期待左呢餐好耐架喇！

其實NAMCO既餃子博物館除左食野，仲有好多野睇架，可以稱得上為一個小型主題樂園

踏入餃子博物館會有好多間店舖等緊你，有傳統煎餃、湯餃、卡通造型餃等等，
每間店都有自己既招牌餃子，今次我就選左食雞翼餃，雞翼裡面有菜有肉架！

餃子以外，呢個館仲有好多貓！


池袋怪談

食飽飽之後，就係博物館到行下喇，
博物館係以古代日本民居及街道做題材，
可能因為當日人流少好靜，我總係感受到一陣唔自在，感覺唔係好舒服咁，
甚至有少少想快D行完快D走，所以都冇乜影相。

當我地行完一樓展館，想上去二樓蛋糕館時，
竟然有一條好陰森恐怖既路係前面(類似鬼屋咁樣)，
原本已經有d驚既我，當然唔肯行入去啦，不過另一半話呢條係上樓上既必經之路，
我唯有May埋眼想好快咁衝過去，一路仲要好驚有野彈出黎嚇我．．．
．
．
．
幸好，安全到達二樓蛋糕館，呢到氣氛係行可愛夢幻路線，d恐怖野冇哂喇，
周圍都有佈置得好靚既蛋糕店雪糕店


驚魂稍定之後，就開始食飯後甜品喇，呢個係我食既，好好味！

 
呢個號稱一生一定要試一次既芝士蛋糕係另一半既，佢話都好好食喎～


食完之後就閃人喇，好彩落一樓時唔駛再經過恐怖走廊，
出到池袋再行左一陣，又睇下人地夾公仔，我地都番酒店休息喇～

累積左呢四日買既手信，冇帶喼既我地，已經好苦惱究竟點樣拎番香港好．．．

Day 4 - マザー牧場 Mather Farm．Part II

Day 4 - マザー牧場 Mather Farm．Part II

『山頂和燒』

告別羊咩之後，時間已經黎到點半鍾喇，嗚，三點半就要走喇，唔想走呀，
正當爭扎玩盡呢兩個鍾頭，定係醫左肚先既時候，
我地聞到附近既山頂傳黎好香好香既烤肉味道，所以就好八掛咁去望下喇～
哇，原來係一個露天和燒場呀！一場黎到，嘿，搵位坐低食番餐先啦！


另一半去買食物時，我就負責搵工作人員幫手清潔桌子，
然後無聊地東張西望之時，餐廳外既風景靚到我啞左成分鐘呀！


回復正常既時候，另一半都買好左食物番黎～
嘿，好肚餓呀，等唔到喇，即刻就開始和燒午宴！


特別加餸：羊架！


唔，黎到Day 4，差唔多地道日本菜都試過哂，好滿足呀！
食飽飽一路沿路行落山，見到成個山坡都係波斯菊～～～

點解可以有個咁靚咁好既地方架！？

『微笑草泥馬』

玩過又食過之後，就黎到呢站既尾二壓軸活動：同草泥馬影相！
趕到場館時，已經有好多當地人排緊隊喇，睇黎草泥馬係日本都好Hit喎，
緊係啦，佢地個樣咁可愛，成日都微笑真係引死人呀！

排隊排左半個鐘，終於都可以接近到第一隻草泥馬啦，
佢有一副壞孩子既外貌同埋可愛既背影，可唔可以帶佢番香港養呀！？


到我喇到我喇！一行埋草泥馬就忍唔住抱佢，
我估佢已經習慣哂熱情既Fans，所以一d不滿都冇，仲擺左個Chok樣出黎影相XD


可惜太多人排隊，可唔可以抱佢耐D啦!!!

『Byebye Mother Farm』

壓軸壓軸壓軸壓軸壓軸節目喇，原本以為唔夠時間，點知仲有30分鐘喎，
即刻跑落山去搵馬仔玩，因為我已經恨左騎好耐架喇！


正式騎馬之前呢，要先學習下同馬仔相處，唔好激嬲佢呀！


500Yen可以騎住馬仔行一個圈，好彩我體重未超標！


岩岩坐上馬時勁驚，因為好拋又坐得側左，領馬員不斷安慰我，
不過．．．我唔識聽日文呀！～～而且要拎實馬鞍唔可以做手語表達，
臨行到番去，領馬員仲叫我舉V手勢．．．嗚，我唔敢放手呀！


落左馬仔，就緊係要餵番佢地啦，不過要小心呢．．．


夠鍾喇，要坐接駁巴士番去．．．臨走之前，幫襯左400YEN一條既燒香腸，
雖然好貴，不過同d低級廚師腸唔同架，好juice好好食！大家有機會一定要試呀！


Byebye Mother Farm，呢日真係好難忘呀，
每次睇番當日既相，就算幾唔開心都會笑番～多謝你地！
．
．
．
同場加映，一公升牛奶！

由於想拎個樽番香港．．．所以當晚兩個人鯨吞左一公升鮮奶！好好味！

Day 4 - マザー牧場 Mather Farm．Part I

Day 4 - マザー牧場 Mather Farm．Part I

話說坐左兩個鐘頭車黎到千葉既某某高山，

原本我都好懷疑究竟マザー牧場 Mather Farm係唔係真係值得黎，
不過一入到園，見到第一隻動物之後，就乜懷疑都冇哂！


其實牧場每個時間都安排左活動同埋表演，所以跟住時間表咁玩就可以睇哂！
首先我地去左睇綿羊show，好鬼得意架！
有唔同國家既綿羊排好隊～同主持人及牧羊狗表演～



表演後，大家可以上台親親羊咩及影相留念，佢地真係好乖呀！



睇完羊咩表現之後，就係我最期待既鴨子大巡遊啦～～～待續！！

『鴨子大巡遊』

就係行去『鴨子大巡遊』場地既時候，首次發現牧場好既風景！
一片大大既草地，望住不盡既山脈～～哇！不枉坐兩個鐘頭車黎呀～～


好緊張呀，好想快d睇成班鴨仔沖埋黎既盛況呀！

當睇完風景又稍等一陣，『鴨子大巡遊』就正式開始啦！心跳加速～
一開閘既時候呢，幾十隻鴨仔已經急不及待咁飛出黎同大家見面啦！


有白色有雜色既鴨仔，衝呀衝呀～左搖右擺咁行得好過癮呀


原來係要衝去工作人員身邊搵食～



冇花冇假，有隻鵝混入左鴨仔推到搵食，唔通醜小鴨既故仔係真既！？


鴨仔巡迴左兩個圈，又同當地小朋友玩過小遊戲之後，就要去休息喇，
嗚，我都好想同佢地玩呀．．．


『崖上的羊兒』

睇完鴨仔之後，我地就去左行左陣手信店喇，當中最搶手既緊係手泥馬公仔啦，
另外仲買左一樽牧場自家制既新鮮牛奶同埋馬油之類既制品，
正當見到有芝士試食，就面懞懞咁去試左一粒，唔！！好好味，不過驚變壞，都係冇買．．．

Shopping完畢之後，我地就要行落山波趕去睇『放羊大會』喇，
趕到既時間仲未開始，正當我仲整理緊岩岩買左既戰利品時，
另一半就叫我快d睇～～但係個山頭咁大，睇咩呀？
冇錯，原來真係睇『咩』，因為有一大堆羊跟住牧羊狗係山上衝緊過黎呀！
當我驚嘆不已想拎相機影相時，羊咩大隊已經跑到落黎面前喇，嗚。


接住落黎，原來係牧羊狗既solo表演，佢帶住一班傻羊散步，
不過會不斷圍住羊咩跑圈，又會用眼神兇一d想離群既羊咩，大家都交足戲呀！


表演後，又係自由活動時間喇，
大家可以係山坡到，同羊咩一齊食草～呀唔係．．．陪佢地食草先岩XD


羊咩好好笑容架，貼住佢地影相都唔會走開！好親切呀！！


玩左十幾分鐘後，羊咩同狗仔都要番屋企休息喇，
不過未玩夠都唔緊要喎，因為附近仲有一班餓羊等緊你餵，
將牧場免費提供既食物落係手心，羊咩就會即刻飛撲過黎食架喇！



＊＊＊特別報告＊＊＊
羊咩係鍾意食紙袋架，裝滿手信既紙袋就係混亂中被羊咩咬爛左．．．

個袋500YEN架．．．

準備指南．マザー牧場．Mother Farm

準備指南．マザー牧場．Mother Farm

正式開始Day 4 Mother Farm既遊記之前,
有感我plan行情時, 最大壓力就係呢日既交通,
事關如果Miss左班JR, 就已經可以放棄唔駛去....
所以我想先介紹一下點樣去Mother Farm, 等有興趣去既網友可以參考下!

Mother Farm網頁: http://www.motherfarm.co.jp/

1. 預約免費接駁巴士

首先到達日本於酒店Check-in後，就可以請酒店致電到TEL. 0439(37)3211預約接駁巴士，
由於接駁巴士只得一班，所以必須要預約，如果冇預約既話，有可能因為冇位而上唔到車。
(最大問題係上唔到車既話，個到係冇其他車去到牧場，有網上資料話要坐4000yen的士先去到)

如果真係不幸full booking都唔駛擔心，因為仲可以有另外一個方法去架，一陣再介紹！

2. 購買牧場入場券

基本上，入場門券可以到達牧場先買，成人1500yen一張，
不過建議大家事前於便利店購買，除左有少少特價外，仲會送一杯價值250yen既雪糕！
購買方法好簡單，只要到任何一間Family Mart既門票售票機，
選好マザー牧場，然後Print張收據拎去收銀到俾錢就得架啦！咁就賺多杯雪糕喇XD

3. 是日交通


M1. 往君津坐免費接駁巴士到牧場

*本方法雖經本人親身實現，惟恐資料有變，有請自行確實*

如果之前成功預約到免費接駁巴士既話，
就請於早上8:50分前黎到ＪＲ横須賀・総武線快速站口，乘坐班次極疏既君津線，


由於下班車一定趕唔到轉接駁巴士，加上東京站非常大又多月台，因此務必要預早時間黎等車！
另外同月台會有其他車駛入，因此請認明住君津先好些車呀！！

當你成功上車之後，恭喜你，你有90分鐘可以休息，
到達君津後，利用南口出閘，然後落地面，就可以去登記10:40開車既免費接駁巴士喇！


其實君津站好細，所以一定可以搵到既，之後就可以安心享受是日行程喇！

M2. 往木更津坐收費巴士到牧場

*本方法未經本人親身實現，必要時請自行再三確實資料不變*

Book唔到免費接駁巴士唔緊要，因為仲有另外一個方法去マザー牧場，
8:20分到達東京站八重洲口前巴士站，可以乘坐高速巴往木更津西口，
落車之後，步行去木更津東口，等9:50分開車既日東交通(株)巴士往牧場，
10:30就可以到達架喇！！！

4. 氣溫

位於千葉某高山既マザー牧場溫度比市區低，
而且風勢頗大，記得帶多件衫先出發呀！

2011．第三新東京紅葉初盛PLUS草泥馬微笑之旅．Day 3

2011．第三新東京紅葉初盛PLUS草泥馬微笑之旅．Day 3

Day 3 - 築地市場

築地市場已經確定於2012年搬遷及清拆，
所以今次行程當然要親臨告別啦！


當行近市場時，遊客及工作人員非常多，一D夕陽既感覺都冇，
可能因為呢次係我第二次黎築地市場，只係舊地重溫，
不過身邊另一半係第一次黎，佢對周圍既店舖非常有興趣，
因為周圍都好多平時少見既大魚或者特別品種，
雖然地下好濕，又多人推車，但係混亂中仍然好有風情！


好啦，行完魚檔就行菜檔喇，估唔到山葵係咁貴架！

仲有好新鮮好靚既水果，不過都唔平呀，原本想食巨峰都打退堂鼓．．．


一場黎到築地市場，緊係要食最最最新鮮既魚生啦，每份成為2000YEN，

食飽飽正覺得奇怪點解冇人排隊食野呢，點知行過兩條街已經見到恐怖既人龍，
其實我食個間已經好好味架啦，唔明白點解有店舖係特別多人排隊，
如果係講新鮮，應該間間都差唔多架，而且又唔係特別平丫．．．

食過飽飽，開始出發行場外市場啦，除左乾貨之外，
仲有好多小食可以邊買邊食，好似炸豬扒、串燒等等，
可惜之前已經食到飽左八成，唔可以掃街真係好遺憾，嗚！
另外，因為都已經到左中午時份，所以好快咁行完場外市場，
我地就出發去上野動物園喇！


Day 3 - 上野動物園

由於係星期六，所以動物園有好多父母帶住年幼既子女睇動物，
情況其實都幾混亂同埋嘈吵架～
不過可以更加溶入到當地文化，見識左好多特別既細節，
比如原本東京既父母都好年輕，唔似香港好多人三十幾歲先生仔，
動物園內見到好多潮媽潮爸帶住兩三個小朋友黎玩，望落去似廿幾歲JA！

Day 3 - 上野

原定既行程呢，離開上野動物園之後會去秋葉源，
但係經過大半日無間斷既步行之後，身體卻很誠實，雙腳已經唔屬於我喇，
我地重臨『上野恩賜公園』稍作休息再決定去路，
沿住『不忍池』行左五分鐘先搵到位坐低。

五時多既東京又開始入黑同埋轉冷喇，
望住不忍池上面既鵝仔船及鴨仔，加埋少少既紅葉，心情又再放鬆



經過一輪冇氣冇力既討論之後，我地決定取消秋葉源既行程，
改為留守上野買手信及晚餐，然後就番酒店休息，保留體力明天大戰Mother Farm！

買完手信之後，開始搵食喇，
其實之前已經食過壽司同拉麵，今餐想搵D地道但又未食過既野，
行左好耐，兜左幾個圈，終於俾我搵到呢間餐廳有賣我既目標喇！而且好味之餘又好平呢！
但係，點解得咁少人幫襯既？而且多數都係上左年紀既日本人，
唔通呢種套餐已經唔興！？

2011．第三新東京紅葉初盛PLUS草泥馬微笑之旅．Day 2

2011．第三新東京紅葉初盛PLUS草泥馬微笑之旅．Day 2

點解我會叫箱根做第三東京，事緣係根據《新世紀福音戰士》劇情，

當而家既東京毀滅左之後，箱根將會係第三個新東京，
亦都係因為咁，箱根有好多手信都同《新世紀福音戰士》有關，真係有心思！

黎到Day 2，因為要趕8:40既浪漫特急去箱根，我地7:00就起身趕出門口！
估唔到去到新宿西口時間尚早，可以食個拉麵做早餐，暖暖肚子。
呢架就係我地坐既舊式特急車喇，係冇展望席架！


到達箱根湯本之後，我地採取逆流方式既行程，
即係先坐巴士去『元箱根港』，再上番大涌谷、強羅、箱根湯本，
所以當巴士到達『元箱根』時遊客唔算多，靜靜咁係湖邊欣賞紅葉及富士山景色！



沿住偉大既杉道往『箱根町港』方向行，身邊好多幾百歲既大樹，感覺非常relax！

一路行大概二十分鐘就到達箱根恩賜公園，可惜時間唔多，所以唔可以仔細咁行哂～


Day 2 箱根 - 海賊船

再行多十分鐘，終於都到達『箱根町港』碼頭，準備坐好有氣勢既海賊船，
當遠遠見到架船已經好興奮啦，估唔到係咁高咁有型架！


面對初紅既山葉同埋咁大既湖，呢個旅遊區令人印象好難忘，
當船開到去『桃源台』時，真係唔捨得離開湖區呀．．．

落左船之後，我地就轉坐吊車上山，望住山下既紅葉同埋遠遠既富士山，
心裡面湧起唔想再番香港對住電腦工作既念頭，但當然冇辦法實現啦．．．


大概十五分鐘，吊車就下面就出現左好多蒸氣，到達著名既溫泉區『大涌谷』喇！

Day 2 箱根 - 大涌谷


雖然箱根吊車係來住桃源台同早雲山，
不過因為一早已經計劃左會係大涌谷既『極樂荼室』食午飯，
所以我地就中沿落車醫肚啦！
老實講餐廳食物唔算得非常好食，不過窗外既風景非常靚！


除左食野之外，大涌谷有好多手信店可以逛，
呢到最出名既就係『黑蛋』！！不過『黑蛋』都有分兩款架～
一種係半生熟既，建議即場食用；另外仲有D係全熟既，一袋有五隻，可以當手信


因為我地19:00就要離開箱根，而時間已經去到14:30喇，
時間唔多，所以只可以淺行大涌谷，而唔可以沿路行上山欣賞風景，
期待下次可以多留幾日，慢慢多次啦


紅葉未完全盛放，不過沿路都見到唔少開始變紅既葉子


Day 2 箱根 - 早雲山->強羅->小王子博物館

再次踏上吊車，就係由箱根最高點大涌谷出發到早雲山吊車總站喇！
到左早雲山之後要再次轉纜車到強羅，然後再轉巴士到『小王子博物館』，
當到達強羅已經開始日落喇，原來已經四點幾．．．
由於『小王子博物館』17:00已經唔可以入場，加上要趕19:00番到『箱根湯本』，
所以呢程車真係等得好心急，而且一度想放棄唔去喇，
好彩冇衝動做錯事，一入到去博物館就覺得轉咁多程車再加1400YEN既入場費都係抵架！

由於太心急入館，唔記得左影門口既靚景，所以遊記一開始已經係館入面啦！
『小王子博物館』分為外景及內館，
戶外有好多個靚景俾你瘋狂影相，包括有大花園、教堂、歐洲大街等等



行左一陣見到有個門口可以入室內，我地就開始內館既旅程喇，
內館主要係介紹《小王子》既故事及歷史同埋作者生平，
如果你係曾經被《小王子》故事感動，你會係呢個館搵到好多溫暖既感覺；
不過未睇過《小王子》既都唔緊要，因為館內擺設及裝飾都非常靚同有氣氛架！



當再次出館既時候，天已經黑左八成喇，不過『小王子博物館』仲未完結～

Day 2 箱根 - 小王子博物館 - 新宿

當逛完『小王子博物館』內館出番戶外後，
第一個感覺係：好凍呀！
十月尾入黑後既箱根氣氛大概同香港最凍既時候差唔多，
不過我既注意力好快就俾眼前既畫面震撼住，唔記得哂有幾凍，
博物館既終點，竟然係一個遍地星光既花園及聖誕樹(!?)，



可惜因為要趕巴士番強羅，唔可以再係博物館留多陣，
經過小王子精品店之後就到達博物館出口，
估唔到咁岩到有車喎，追完上左車先醒起冇係門口影張相留念．．．

坐巴士番到強羅之後，就轉小火車落山去箱根湯本準備回程喇，
我地真係好唔捨得箱根呀，一個咁靚既地方，而且仲保育得好好，
不期然會感慨點解香港只係識得拆走有旅遊價值既景點去起商場？
希望下次再黎箱根，風景可以繼續咁靚啦！


我地就係坐呢架特急番新宿架喇，之前特登上網訂左展望席第一行架～
雖然天黑左，不過周圍既景色都幾特別！

終於21:00番到新宿，晚餐係思憶之橫丁既『若月』拉麵，仍然係又平又好食。
Day 2完成啦，Day 3係築地加上野遊，我會再繼續努力更新，
請大家多多支持，留句言啦

2011．第三新東京紅葉初盛PLUS草泥馬微笑之旅

2011．第三新東京紅葉初盛PLUS草泥馬微笑之旅

2011．10月．27~31日東京之旅終於都完成啦！


正式詳細遊記之前，先簡介一下行程：
Day 1: 新宿、涉谷
Day 2: 箱根 (第三新東京)
Day 3: 告別築地、上野
Day 4: Mother Farm、池袋
Day 5: 新宿、機場

Day 1 - 新宿

今次旅行既起因係CX做飛撲日本機票大減價，
兩人來回東京連稅HK$5380，比起暑假時平超過50%呀！
所以成就左今次五天之旅喇！

第一日一早，我地就坐9:10分起飛既航班出發去東京，
係飛機上面睇左《醉爆伴郎團2》，然後再眠左一眠，
好開心飛機早左大半個鐘降落，令我地可以趕到14:48分既N'ex出新宿~

大概16:00出到新宿，落車第一個感覺係『好凍』！
事前我已經知道東京大概得十幾度，但係個陣寒風真係唔講得笑，
重新整理上身上衣物之後，我地立即趕去小田急中心買明天箱根之旅既周遊票，
雖然英語溝通上有少少困難，不過最後都好順利買到預訂左既展望席車票！

東京大概4:30就開始日落，隨著天色越來越暗，
我地之後就出發去搵小食醫肚喇，目標係『中村屋』既咖哩飽，
由於唔熟路，要兜左一陣先搵到所在位置，
可惜注定要失望喇．．．去到見到既，竟然係落左閘既『中村屋』，
門口有一堆日文聲明，雖然睇唔明白，不過重點就係冇得食．．．嗚


饑寒交迫加上失望之情，唯有寄望之後涉谷既豐富晚餐，
所以我忍住肚餓，出發去位於東新宿既『Hotel Sunroute Higashi Shinjuku』Check-in，
沿路經過日清杯麵公司，好有氣勢既一間公司呀！

大概行左廿分鐘左右，尚算順利搵到酒店，
我地完成Check-in後，就放低手頭上係行李，
係酒店樓下既東新宿站，坐『副都心線』出發去涉谷食野啦！

Day 1 - 涉谷 and 新宿

到達涉谷之後第一個mission就係搵食啦！
今餐係另一半帶路既，因為佢話之前同同事食過覺得好好味，
所以我就跟住佢係涉谷上斜落斜入酒店再轉出商場，
大概19:00去到一間叫『美登利』既日本餐廳門口啦，
見到餐廳門口有一條長長既人龍我已經面色一沉，
事關我當日除左係香港機場食左個唔太好食既早餐，已經全日冇野落過肚，
咁樣排法不知要何年何日先入到去食喇．．．
不過因為尊重另一半既心思，所以我都乖乖咁等，
好彩d人都食得好快，半個鐘先多d就入到去點餐啦！

『美登利』係一間叫壽司Set既餐廳，我點左個2190Yen既套餐，
除左壽司之外，套餐仲有蒸蛋及一個不知名既沙律，
由於好凍，所以我先食左個蒸蛋暖暖身先，唔～～都幾好味喎！
之後就開始食個其貌不揚既沙律喇，好猶豫咁食左一小口，
我就『哇』左聲，原來係蟹黃沙律呀，好香好新鮮！勁好食呀！！


之後既壽司呢．．．由於太肚餓啦，食完先醒起冇影相呀，哈哈，
食飽飽就出發行程啦，涉谷周圍行下，又入便利店買埋農場既門票，
沿路見到有UFO店(夾公仔店)就入去睇下，見到一款好想要既景品，
但係玩左500YEN都冇頭緒點樣先拎到，唯有放棄佢啦．．．
最後因為我地都唔喜歡shopping，所以行左陣就坐巴士回歸新宿喇！


意想不到返到新宿既行程係～～繼續夾公仔！
其實我對日本夾公仔好有好感，因為06年時，公仔係好容易就夾到，
個時UFO既抓真係可以夾得實D公仔架，大概玩500YEN就可以拎到獎品，
但係今次完全唔同哂，UFO抓完全係鬆架，
另一半睇中左一隻會行既HAPPY TREE FRDS公仔，試左3次(500YEN)都整唔郁佢，
我見其他日本人會係咁叫店員黎幫手，所以有樣學樣咁搵店員，
雖然聽唔明佢講乜，不過透過手勢都大概明白既，
又試左3次都冇反應，又再搵店員黎幫手，佢將公仔再放出少少，用手勢再教我地，
我地再入錢去試，可惜仍然失敗，
店員黎到見到咁既情況，發現之前教錯左我地，今次將隻公仔放到一定跌既位置，
玩多2次之後，呢隻價值連城既公仔終於都拎到手啦！


 夾完公仔之後，我地一路行番酒店，一路檢討點樣可以容易D拎到公仔，
發現唯一既方法係，每夾一兩次就搵店員幫手，如果唔係，根本就冇可能靠自己夾到！

Day 1行程結束，期待Day 2 第三東京(箱根)之旅！

朋友仔

朋友仔

再次跟盧倩倩結交友誼起來，我自覺真的長大了，
多年來已經忘了為什麼中學後會跟她失散不再見，
一直都覺得很可惜，很想跟她重修舊好，
幸運的她沒有記著舊惡，仍然願意在十年後繼續成為我的好友。
直到那晚回到娘家收拾，讀到差不多十年前的日記，
中四時的我，不知天高地厚，也反叛得性格十分討人厭，
因為一個於今天對我來說是毫不重要的人，我主動跟她疏遠，
浪費了五六年沒有維繫友誼的時間，後悔了。
剛剛的週末，跟她吃飯預祝她的生日，
由六時半，一直聊聊聊到十時，
有說到開心的，不開心的，
才發現我跟她是那麼的接近，再一次得到她的友誼，
有很溫暖又窩心的感覺，
畢竟在這孤單的大半個月中，這次見面為我打氣了。

最近，太多時間一個人，亦花太多時間去『想』，
想到這首歌，不期然眼紅紅的，
中四那年一起聽的歌，想不到今天會成為了我的心聲，
倩倩，對不起，只因常常在你附近，便拿著你出氣。

朋友仔　Twins 作曲：陳輝陽@好好笑
填詞：林夕
編曲：陳輝陽@好好笑

最多握握手 一起散散步
你大量 你寬容 你是未來濱崎步
無論是為什麼都好 首先最錯我的態度
懊悔昨日那麼嘈 然後在霎時之間想起我父母
我也不想記起
為當天襯衫似你 便心急妒忌
其實我 都很小器
對不起 只因常常在你附近 便拿著你出氣
◎原來朋友仔感情再天真
亦是我永遠也會愛惜的人
明日愛他人 也記住學會不要緊

原來朋友比戀人更高分
亦讓我開始懂得不記恨
若大家 都敏感
我更要永遠記得拒絕再因小事怪人
為何沒有這條校訓
再次握握手 只想你以後
有眼淚 放心流 冷淡令人很難受
無論日後路怎麼走
彼此老友角色似舊
以後在動氣關頭 回望著這場爭吵想想 也很醜
REPEAT◎
像望著自己的至親
往往太奮勇鬥嘴
以後再不懂事過人
如何共我戀人熱吻

內傷

內傷

零五年中，買入了第一個物業，
搬出了和媽媽及弟弟一起住的單位，
很多人不看好二十歲的小女孩搬離娘家，
可是不管大家怎麼看，離家的日子，已經六年了，
多少快樂、悲傷的時光，也是一個人撐著。
一直有些雜物如舊照片、舊信件、紀念冊等等留在媽媽家，
終於星期六不得不把它們都收拾好，以免再佔著櫃子位置。
一邊看著十年前的小日記，看清楚了當天的我是多麼的少年輕狂，
那段混亂的日子，身邊走過一個個的人，
記憶中，我一直以為自己是被傷害的那個，
可是看過自己親手寫的日記後，才知道這根本是『自欺欺人』，
原來，那天不認真、不珍惜、不努力的是我，
這一兩天，曾經有個衝動跟那個被我誤會了多年的人說聲對不起，
可是，都十年了，往事再提又有什麼好處呢？

那天我們常常唱的歌，已經給了我們最大的啟示：
當天你與我怎樣重視過誰和誰在，年月快線裏都給壓碎
再三考慮後，小日記、舊信件都統統掉到垃圾袋內，
意味著，要正式告別那天的自己、那天的記憶、及那天的你。
滿以為收拾過後是鬆一口氣，重返簡單平靜的生活，
想不到，會被我發現了另外一個深深的衝擊，
或許這樣說很灰諧，但我是真的被傷害了，
我一直也認命，媽媽心目中最重要的是弟弟，
無論我如何努力、如何成功，媽媽也覺得我比不上他。
自從分開住之後，比不上弟弟的感覺減輕了，
可能是因為眼不見為乾淨吧，
見面少一點，吵架又少一點的。

可是在婚宴那天，明明我們趕著時間要由屯門到尖沙咀，
媽媽卻怕已經二十歲的弟弟不懂自己去，
一直要我們等他跑完步回來。
那一刻是很傷心的，在她心目中，我的婚宴原來是這麼的不重要。

上星期六，媽媽說爺爺有一個小金牌遺物，她已經給了弟弟，
爺爺的遺物對我很重要，而且弟弟跟爺爺根本一點感情也沒有，
我帶著受傷的語氣問她：為什麼一定是給弟弟？為什麼之前不跟我說一聲，
她想了想，說因為這金牌應該要給男丁．．．
那刻我快忍不住了，勉強的跟她說不要賣給其他人，要賣就賣給我，
然後便逃走似的離開這個舊居，
然後就如以前讀書時，在田景的陰暗處痛哭著，
心裡面一直想著，我不是貪什麼金牌，只是想要回爺爺的最後物品，
我阻不了自己，那一刻真的很討厭他們，
由始至終，他們一直把我排在門外，我一直都是外人，
有事時，要錢時，電腦壞了，會當我是家人，
可是其他呢？這麼多年來，原來我只是一個人過活。

哭了兩天，前前後後的想過了，
既然爺爺一直在我心中，其實有沒有紀念品也不要緊，
他還是常在我心，相信爺爺也不想我因為這件事而不開心。
但是，他們兩個，這麼多年來，是最傷我的人，
疏遠他們，是最好的療傷方法。

心理質素

心理質素

不得不對自己承認，最近的心理質素很差，

可能出於不適應新生活的關係，怨氣頗大，
但是我知道這樣是不對的，除了不快樂之外，對整體沒有幫助，
應該要開始改善觀點來加強成長，從而開始做人要『正面』一點。

其實我是沒有資格抱怨的，
10年尾的失業，十八天獲得新公司的聘用；
公司的太子爺很器重我，為我爭取了些還好的工作設施；
出奇地，公司的師奶與叔父也願意和我親近聊天；
工作內容完全可以應付，還有空餘時間上網學習新的事物。

為什麼我卻不滿意呢？原因之一，
是因為每週工作四十九小時，星期一至五，早上八時半到黃昏六時半，
還有星期六的早上八時半到十二時半，
雖然說以前的工作加班時間很多，可是加班是自由的，
我可以調節工作來控制工時，亦總會有不用加班的日子可作休息，
自從開始了新工作後，每天只有晚上八時至十一時可以自由活動，
但經過了一天十小時的上班後，體力卻不支，只能回家看書睡覺。

為什麼我卻不滿意呢？原因之二，
是因為很想創一番事業，卻發現公司並不需要新的發展，
公司代理了兩款老牌產品，收入已經很穩定，
其實根本不需要我來為公司打拼什麼，
就這樣，很長的工作時間中，卻沒有工作目標，
過多的思考造成心理質素很差的問題，經常有種在浪費生命的感覺。

婚後的生活也造就了不少適應問題，
主要是媽媽以前很少給我什麼寄望或規條，
我一直都是用自己的方式來生活及生存，別人並不能管我什麼。
但是婚後突然有三個家要應付，其中一個是沒有自主權的。

就在婚宴上的末段，在原本還算歡樂的氣氛下，
被男家媽媽的親戚不合理的痛罵了一頓，還被迫飲酒賠罪後，
老實說，我是徹頭徹尾的對這幾個人感到害怕，
而且有很多世俗的不明文規定需要去遵守，
一直自由自主的我，有點招架不住，有點想逃避．．．
很害怕她又會有新的要求想我做到，害怕聽到對於『懷孕』的提醒，
但可以如何逃呢？連一星期沒有跟她吃飯，也有罪疚感。

其實是我想太多了，若果心裡面沒有這個人，根本不會害怕，
其實每星期見面只要微笑著不回應便可以混過去了，
可是微笑是很累的，
可是每週工作四十九小時也是很累的，
這麼累的生活環境令人很灰很沒生氣，
所以我知道絕對要改善這種心理狀況，
但應該如何做起呢．．．細味《苦瓜》歌詞

苦瓜　陳奕迅
作曲：Kenix Cheang@Private Zoo
填詞：黃偉文
編曲：Kenix Cheang@Private Zoo

共你乾杯再舉箸　突然間相看莞爾　
盤中透著那味兒
大概今生有些事　是提早都不可以　
明白其妙處

就像你當日痛心她回絕一番美意
怎發現你從情劫亦能學懂開解與寬恕
也像我很糾結的公事　
此際回頭看　原來並沒有事

﹡真想不到當初我們也討厭吃苦瓜
今天竟吃得出那睿智愈來愈記掛
開始時捱一些苦　栽種絕處的花
幸得艱辛的引路　甜蜜不致太寡

青春的快餐只要求快不理哪一家
哪有玩味的空檔來欣賞細緻淡雅
到大悟大徹將虎嚥的昇華　等消化學沏茶　
至共你覺得苦也不太差

下半生竟再開學　入迷的終於醒覺　
移走最後的死角
用痛苦烘托歡樂　讓餘甘彰顯險惡　
如藝壇傑作

就像我一直聽香夭從未沾濕眼角
仔細地看神壇裡木紋什麼精巧也不覺
卻在某蕭瑟晚秋深夜　
忽爾明瞭了　而黃葉便碎落

﹡REPEAT

做人沒有苦澀可以嗎

真想不到當初我們也討厭吃苦瓜
當睇清世間所有定理又何用再怕
珍惜淡定的心境　苦過後更加清
萬般過去亦無味但有領會留下

今天先記得聽過人說這叫半生瓜
那意味著它的美年輕不會洞察嗎
到大悟大徹將一切都昇華　這一秒坐擁晚霞　
我共你覺得苦也不太差

成年人的責任

成年人的責任

孫燕姿的《天黑黑》中，有一句很動人的歌詞：

『是否成人的世界背後．總有殘缺？』

由中四第一次接觸到這首歌，就真喜歡這一句歌詞，
 

那時的我，自以為懂得成人的世界，以為已經看透了，
當然二十五歲的我，也會取笑自己當天的幼稚和自大。
成人的世界究竟是怎樣？小時候期待的是自由與自主，

渴望長大的願望實現了，但期待的有出現嗎？
某程度上是的，起碼可以決定今天要吃什麼，要幾點睡覺，
只是自由換來責任的枷鎖，卻謀殺了自由的感覺。

自二十歲買了房子來獨立生活，就已經開始意識到要為自己負責任，
即使很累很痛恨公司，仍然會裝作歡容的繼續上班，
為的就是要確保房子的供款沒有問題。

到成婚了，有些從來沒有想過的重大責任突然加諸到身上，
有人會喜歡會種甜蜜的負擔，可是我卻不，
是有種被人企圖著計算著勉強著的感覺，
而偏偏這個責任，可以說得這樣天經地義，
如果辦不到，就是我的過失與問題．．．

今次日誌不打啞謎了，直接的說就是，
其實結婚只為了『單純美好的小幸福』，
若果一直受到生育的壓力，無論這種壓力來自何人，
我也只可以選擇逃避他來捍衛我的成人世界，
別探討我是否不想要小孩子，也請別給我任何罪名，
我也一樣是要每天上班每天做家務的平民，
若真的很喜歡很想要小朋友，請到保良局去領養讓愛惠及他人，
請不要不要不要再把我拿來當話題或開場白了，
真受不了。

雖然以下這首歌的歌詞說的情況不同，
但那種被討論的尷尬卻是一樣的，
有時外國人之間的私隱與尊重，我們真的很需要學習。

我們的近況　湯寶如
作曲：Dick Lee
填詞：黃偉文

他跟我甚要好 備受同伴看好
被認為遲或早一起 會終老
定論還是太早　我也未預計到
到最後會鬧翻分手 那麼糟

觀眾及友好 怎去面對好
這種事沒法子大肆舖張 去宣佈

有人問到 我們近況　
我便說大家各自忙著
真的故事 真的不太想講

常常亦有人問到　我們近況
最近有事幹沒見對方 假使已會意
不要迫我講　其實我們沒有近況

是近來沒有空 或外遊渡假中
不識趣的問他怎麼會失蹤
任問題落了空 藉故望向半空
勉強地笑扮啞裝瘋 聽不懂

當然有苦衷 當然有隱衷
可惜話到咀邊像五千噸 那麼重

心洞

心洞

心底裡有一個洞，
由原本很大很大的，一不小心就會掉下去，
到現在，慢慢的縮小了，不留心便不會把它發現，
可是又很清楚，這個洞並不會消失，
而是會慢慢陪伴我共渡餘生。

亦舒寫得很好，短短幾句完全道出了這種感覺：
『生我的人已經不在，身體某部分也跟著他逝去，
以後，再大的快樂也打了折扣，非常無奈』
隨著爺爺於十二月十六日早上的離開，
曾經一度精神處於離魂的狀態，不能想不能講不能接收外界的訊息，
經過自我療傷的四步曲後，漸漸好一點了，
只是什麼聖誕新年也完全沒有心情去玩樂，
反而靜靜的躲起來，不笑也不哭，是最安全的感覺。

直到十二月三十一日下午，又被另外一件事追撃，
其實在W公司工作了兩年多的日子一直也不如意，
對對錯錯也不再多說了，反正那時大家也有點不成熟吧。
W公司選擇了於除夕的下午跟我說再見，我跟它的將來延不至兔年，
雖然在判死的一刻我仍然扮作明瞭，還送上招牌式的假笑臉，
可是心裡仍然惱，惱著公司計算自己的利益那麼準，卻把我趕絕了。
它們要求我工作到一月三十一日才離職，做妥了新項目的工作再走，
還有什麼『好來好去，不想大家難受，有HARD FEELING要提出』，
聽完了我也不明白為什麼這個世界有這樣自私又賤的公司和老闆，
這樣的除夕分手，並要人失著業過新年，怎麼可能沒有HARD FEELING?

接受了這個通知後，那晚安排了的除夕活動也取消了，心情很複雜，
一邊是自信心的新低，一邊是擔心未來的生活，當然中間也夾雜了憤恨，
就這些感覺都佔據了整個元旦假期的思緒，並不斷的轉牛角尖。
還好，理智自救了，星期日快快的修改CV和Cover letter，
正式開始求職去，由一月三日開始到一月十七日，我共參與了九場面試，
在寒冷的天氣下，跑過柴灣、則魚涌、銅鑼灣、荃灣等等地方，
這段時間裡都要靠安眠藥幫助入睡，但到一月旬時，安眠藥已經失效了。

後來，感覺上是因為爺爺的眷顧，這段黑暗的時間只維持了十八天，
就在一月十八日，收到了一家公司的聘任電話，終於可以脫離失業的標籤，
之後，一月十九日再有另外一家公司給我更好的薪水來聘請我，
心終於都定下來了，落實了一月二十日就到新公司上班，
我知道爺爺會繼續看守著我，就像兒時一樣，他不會掉下我不理的。

心中的洞，由回憶、悔疚、掛念組成，
爺爺早已於一月九日舉殯，可是暗暗的，仍然想到老人院跟他聊聊天，
可是回神過來，才想起他已經不在了，再來不能和他聊天氣，替他搽藥膏，
這一洞是不會合上的了，過去的開懷大笑享受世界也不能再如前，
這樣，或許當作是一種成長吧，是離別的成長．．