2011年11月14日 星期一

2011.第三新東京紅葉初盛PLUS草泥馬微笑之旅.Day 5

2011.第三新東京紅葉初盛PLUS草泥馬微笑之旅.Day 5

Day 5 新宿

最後一日,我地將於16:20乘坐CX番香港,
所以會坐12:40開既N'EX出發去機場,
時間唔多,所以今日集中係新宿活動。

經過連日黎既早起,Day 5終於可以訓到9點起身喇,
最後一輪收拾及Packing後,我地由東新宿坐JR去到新宿西口,
搵左一陣先係JR閘口搵到大型Locker,400Yen就可以放哂行李入去!

無物一身輕,即刻飛奔落小田食品場買塊大吉列豬扒食,
然後就行去思憶之橫丁附近既大黑屋,想睇下有冇平價Baby-G執,
可惜仲未開舖...
一邊行下行下,又去番Day 1個間夾公仔店,
點知俾我發現到重大既挫折...
夾公仔店竟然做緊全場100Yen!!比我地Day 1夾平左一半呀!

因為我既貪玩,而且又睇中左隻草泥馬公仔,就唱左1000yen玩喇!
今次我地醒左喇,每完一次都會搵店員黎幫手,
結果唔駛1000yen就已經夾到手,Yohohohohoho!
你地睇下呢公仔係唔係好得意,而且抱上手仲好軟好舒服架~~


夾完公仔再去番大黑屋終於都開左店,不過冇野睇得岩,
我地度下度下又黎到Keio百貨,因為仲有少少時間就行下,
發現左一個以『鯨魚』做Logo既帆船袋牌子,
用料好特別,設計亦到好靚,加上男店員努力用英文講解,
我考慮左一陣就買左個6615yen既餃子袋,
當時另一半已經有d想買個18xxxyen既大袋,不過都係忍手,
到我買完,行左上幾層佢又心掛掛,結果都係買左XD

拎左貨之後時間已經唔多,不過都趕去搞退稅,
點知因為我地分開左單購買,只有另一半個件可以退...嗚,
好喇,真係冇時間喇,我地用盡最後二十分鐘衝番去小田食品場,
買埋是日午飯上N'ex食,呢份係另一半食既豬扒飯

 
而我緊係食壽司啦!


趕頭趕命咁,仲要行勁遠終於12:30到站口等車,
14:00鍾到達機場,原本以為過關要好耐,
結果14:20就已經KO...仲有2個鍾都唔知做咩好,
機場又唔算多野行,但我地都來回行左2~3次,
行到冇野好行又累,就去用200YEN 10分鐘既按摩機,其實都幾舒服!

好喇,上機啦~~而今次遊行亦完滿結束,多謝大家收看!

2011年11月9日 星期三

Day 4 池袋Sunshine City NAMCO 餃子博物館

Day 4 池袋Sunshine City NAMCO 餃子博物館

離開Mother Farm之後,又要經歷90分鐘既回程喇,

到達東京站時已經六點鐘,我地係東京地下街行左一陣,
不過個到特色野唔多,反而好多貴價蛋糕及和食店,
最後閒逛左鬆弛熊專門店就閃人~出發去池袋開餐喇!

就係計劃行情時,已經決定左呢日晚餐係要去Sunshine City內NAMCO既餃子博物館食,
不過由於Sunshine City遠離大街有段路程,而我又發揮迷路精神...
結果左搵右搵一大輪先去到Sunshine City大樓,
入到商場又再搵啊搵啊都搵唔到NAMCO係邊到,差d以為佢執左呀,
幾經辛苦行入左個後樓梯反而見到指示,
跟住行左陣終於都搵到喇!好彩未執ja,因為另一半已經期待左呢餐好耐架喇!

其實NAMCO既餃子博物館除左食野,仲有好多野睇架,可以稱得上為一個小型主題樂園

踏入餃子博物館會有好多間店舖等緊你,有傳統煎餃、湯餃、卡通造型餃等等,
每間店都有自己既招牌餃子,今次我就選左食雞翼餃,雞翼裡面有菜有肉架!

餃子以外,呢個館仲有好多貓!


池袋怪談

食飽飽之後,就係博物館到行下喇,
博物館係以古代日本民居及街道做題材,
可能因為當日人流少好靜,我總係感受到一陣唔自在,感覺唔係好舒服咁,
甚至有少少想快D行完快D走,所以都冇乜影相。

當我地行完一樓展館,想上去二樓蛋糕館時,
竟然有一條好陰森恐怖既路係前面(類似鬼屋咁樣),
原本已經有d驚既我,當然唔肯行入去啦,不過另一半話呢條係上樓上既必經之路,
我唯有May埋眼想好快咁衝過去,一路仲要好驚有野彈出黎嚇我...



幸好,安全到達二樓蛋糕館,呢到氣氛係行可愛夢幻路線,d恐怖野冇哂喇,
周圍都有佈置得好靚既蛋糕店雪糕店


驚魂稍定之後,就開始食飯後甜品喇,呢個係我食既,好好味!

 
呢個號稱一生一定要試一次既芝士蛋糕係另一半既,佢話都好好食喎~


食完之後就閃人喇,好彩落一樓時唔駛再經過恐怖走廊,
出到池袋再行左一陣,又睇下人地夾公仔,我地都番酒店休息喇~

累積左呢四日買既手信,冇帶喼既我地,已經好苦惱究竟點樣拎番香港好...

2011年11月8日 星期二

Day 4 - マザー牧場 Mather Farm.Part II

Day 4 - マザー牧場 Mather Farm.Part II


『山頂和燒』

告別羊咩之後,時間已經黎到點半鍾喇,嗚,三點半就要走喇,唔想走呀,
正當爭扎玩盡呢兩個鍾頭,定係醫左肚先既時候,
我地聞到附近既山頂傳黎好香好香既烤肉味道,所以就好八掛咁去望下喇~
哇,原來係一個露天和燒場呀!一場黎到,嘿,搵位坐低食番餐先啦!


另一半去買食物時,我就負責搵工作人員幫手清潔桌子,
然後無聊地東張西望之時,餐廳外既風景靚到我啞左成分鐘呀!


回復正常既時候,另一半都買好左食物番黎~
嘿,好肚餓呀,等唔到喇,即刻就開始和燒午宴!


特別加餸:羊架!


唔,黎到Day 4,差唔多地道日本菜都試過哂,好滿足呀!
食飽飽一路沿路行落山,見到成個山坡都係波斯菊~~~

點解可以有個咁靚咁好既地方架!?

『微笑草泥馬』

玩過又食過之後,就黎到呢站既尾二壓軸活動:同草泥馬影相!
趕到場館時,已經有好多當地人排緊隊喇,睇黎草泥馬係日本都好Hit喎,
緊係啦,佢地個樣咁可愛,成日都微笑真係引死人呀!

排隊排左半個鐘,終於都可以接近到第一隻草泥馬啦,
佢有一副壞孩子既外貌同埋可愛既背影,可唔可以帶佢番香港養呀!?


到我喇到我喇!一行埋草泥馬就忍唔住抱佢,
我估佢已經習慣哂熱情既Fans,所以一d不滿都冇,仲擺左個Chok樣出黎影相XD


可惜太多人排隊,可唔可以抱佢耐D啦!!!

『Byebye Mother Farm』

壓軸壓軸壓軸壓軸壓軸節目喇,原本以為唔夠時間,點知仲有30分鐘喎,
即刻跑落山去搵馬仔玩,因為我已經恨左騎好耐架喇!


正式騎馬之前呢,要先學習下同馬仔相處,唔好激嬲佢呀!


500Yen可以騎住馬仔行一個圈,好彩我體重未超標!


岩岩坐上馬時勁驚,因為好拋又坐得側左,領馬員不斷安慰我,
不過...我唔識聽日文呀!~~而且要拎實馬鞍唔可以做手語表達,
臨行到番去,領馬員仲叫我舉V手勢...嗚,我唔敢放手呀!


落左馬仔,就緊係要餵番佢地啦,不過要小心呢...


夠鍾喇,要坐接駁巴士番去...臨走之前,幫襯左400YEN一條既燒香腸,
雖然好貴,不過同d低級廚師腸唔同架,好juice好好食!大家有機會一定要試呀!


Byebye Mother Farm,呢日真係好難忘呀,
每次睇番當日既相,就算幾唔開心都會笑番~多謝你地!



同場加映,一公升牛奶!

由於想拎個樽番香港...所以當晚兩個人鯨吞左一公升鮮奶!好好味!

Day 4 - マザー牧場 Mather Farm.Part I

Day 4 - マザー牧場 Mather Farm.Part I


話說坐左兩個鐘頭車黎到千葉既某某高山,

原本我都好懷疑究竟マザー牧場 Mather Farm係唔係真係值得黎,
不過一入到園,見到第一隻動物之後,就乜懷疑都冇哂!


其實牧場每個時間都安排左活動同埋表演,所以跟住時間表咁玩就可以睇哂!
首先我地去左睇綿羊show,好鬼得意架!
有唔同國家既綿羊排好隊~同主持人及牧羊狗表演~



表演後,大家可以上台親親羊咩及影相留念,佢地真係好乖呀!



睇完羊咩表現之後,就係我最期待既鴨子大巡遊啦~~~待續!!

『鴨子大巡遊』

就係行去『鴨子大巡遊』場地既時候,首次發現牧場好既風景!
一片大大既草地,望住不盡既山脈~~哇!不枉坐兩個鐘頭車黎呀~~


好緊張呀,好想快d睇成班鴨仔沖埋黎既盛況呀!

當睇完風景又稍等一陣,『鴨子大巡遊』就正式開始啦!心跳加速~
一開閘既時候呢,幾十隻鴨仔已經急不及待咁飛出黎同大家見面啦!


有白色有雜色既鴨仔,衝呀衝呀~左搖右擺咁行得好過癮呀


原來係要衝去工作人員身邊搵食~



冇花冇假,有隻鵝混入左鴨仔推到搵食,唔通醜小鴨既故仔係真既!?


鴨仔巡迴左兩個圈,又同當地小朋友玩過小遊戲之後,就要去休息喇,
嗚,我都好想同佢地玩呀...


『崖上的羊兒』

睇完鴨仔之後,我地就去左行左陣手信店喇,當中最搶手既緊係手泥馬公仔啦,
另外仲買左一樽牧場自家制既新鮮牛奶同埋馬油之類既制品,
正當見到有芝士試食,就面懞懞咁去試左一粒,唔!!好好味,不過驚變壞,都係冇買...

Shopping完畢之後,我地就要行落山波趕去睇『放羊大會』喇,
趕到既時間仲未開始,正當我仲整理緊岩岩買左既戰利品時,
另一半就叫我快d睇~~但係個山頭咁大,睇咩呀?
冇錯,原來真係睇『咩』,因為有一大堆羊跟住牧羊狗係山上衝緊過黎呀!
當我驚嘆不已想拎相機影相時,羊咩大隊已經跑到落黎面前喇,嗚。


接住落黎,原來係牧羊狗既solo表演,佢帶住一班傻羊散步,
不過會不斷圍住羊咩跑圈,又會用眼神兇一d想離群既羊咩,大家都交足戲呀!


表演後,又係自由活動時間喇,
大家可以係山坡到,同羊咩一齊食草~呀唔係...陪佢地食草先岩XD


羊咩好好笑容架,貼住佢地影相都唔會走開!好親切呀!!


玩左十幾分鐘後,羊咩同狗仔都要番屋企休息喇,
不過未玩夠都唔緊要喎,因為附近仲有一班餓羊等緊你餵,
將牧場免費提供既食物落係手心,羊咩就會即刻飛撲過黎食架喇!



***特別報告***
羊咩係鍾意食紙袋架,裝滿手信既紙袋就係混亂中被羊咩咬爛左...

個袋500YEN架...

準備指南.マザー牧場.Mother Farm

準備指南.マザー牧場.Mother Farm


正式開始Day 4 Mother Farm既遊記之前,
有感我plan行情時, 最大壓力就係呢日既交通,
事關如果Miss左班JR, 就已經可以放棄唔駛去....
所以我想先介紹一下點樣去Mother Farm, 等有興趣去既網友可以參考下!

Mother Farm網頁: http://www.motherfarm.co.jp/

1. 預約免費接駁巴士

首先到達日本於酒店Check-in後,就可以請酒店致電到TEL. 0439(37)3211預約接駁巴士,
由於接駁巴士只得一班,所以必須要預約,如果冇預約既話,有可能因為冇位而上唔到車。
(最大問題係上唔到車既話,個到係冇其他車去到牧場,有網上資料話要坐4000yen的士先去到)

如果真係不幸full booking都唔駛擔心,因為仲可以有另外一個方法去架,一陣再介紹!

2. 購買牧場入場券

基本上,入場門券可以到達牧場先買,成人1500yen一張,
不過建議大家事前於便利店購買,除左有少少特價外,仲會送一杯價值250yen既雪糕!
購買方法好簡單,只要到任何一間Family Mart既門票售票機,
選好マザー牧場,然後Print張收據拎去收銀到俾錢就得架啦!咁就賺多杯雪糕喇XD

3. 是日交通


M1. 往君津坐免費接駁巴士到牧場

*本方法雖經本人親身實現,惟恐資料有變,有請自行確實*

如果之前成功預約到免費接駁巴士既話,
就請於早上8:50分前黎到JR横須賀・総武線快速站口,乘坐班次極疏既君津線,


由於下班車一定趕唔到轉接駁巴士,加上東京站非常大又多月台,因此務必要預早時間黎等車!
另外同月台會有其他車駛入,因此請認明住君津先好些車呀!!

當你成功上車之後,恭喜你,你有90分鐘可以休息,
到達君津後,利用南口出閘,然後落地面,就可以去登記10:40開車既免費接駁巴士喇!


其實君津站好細,所以一定可以搵到既,之後就可以安心享受是日行程喇!

M2. 往木更津坐收費巴士到牧場

*本方法未經本人親身實現,必要時請自行再三確實資料不變*

Book唔到免費接駁巴士唔緊要,因為仲有另外一個方法去マザー牧場,
8:20分到達東京站八重洲口前巴士站,可以乘坐高速巴往木更津西口,
落車之後,步行去木更津東口,等9:50分開車既日東交通(株)巴士往牧場,
10:30就可以到達架喇!!!

4. 氣溫

位於千葉某高山既マザー牧場溫度比市區低,
而且風勢頗大,記得帶多件衫先出發呀!

2011年11月7日 星期一

2011.第三新東京紅葉初盛PLUS草泥馬微笑之旅.Day 3

2011.第三新東京紅葉初盛PLUS草泥馬微笑之旅.Day 3

Day 3 - 築地市場

築地市場已經確定於2012年搬遷及清拆,
所以今次行程當然要親臨告別啦!


當行近市場時,遊客及工作人員非常多,一D夕陽既感覺都冇,
可能因為呢次係我第二次黎築地市場,只係舊地重溫,
不過身邊另一半係第一次黎,佢對周圍既店舖非常有興趣,
因為周圍都好多平時少見既大魚或者特別品種,
雖然地下好濕,又多人推車,但係混亂中仍然好有風情!


好啦,行完魚檔就行菜檔喇,估唔到山葵係咁貴架!

仲有好新鮮好靚既水果,不過都唔平呀,原本想食巨峰都打退堂鼓...


一場黎到築地市場,緊係要食最最最新鮮既魚生啦,每份成為2000YEN,

食飽飽正覺得奇怪點解冇人排隊食野呢,點知行過兩條街已經見到恐怖既人龍,
其實我食個間已經好好味架啦,唔明白點解有店舖係特別多人排隊,
如果係講新鮮,應該間間都差唔多架,而且又唔係特別平丫...

食過飽飽,開始出發行場外市場啦,除左乾貨之外,
仲有好多小食可以邊買邊食,好似炸豬扒、串燒等等,
可惜之前已經食到飽左八成,唔可以掃街真係好遺憾,嗚!
另外,因為都已經到左中午時份,所以好快咁行完場外市場,
我地就出發去上野動物園喇!


Day 3 - 上野動物園

由於係星期六,所以動物園有好多父母帶住年幼既子女睇動物,
情況其實都幾混亂同埋嘈吵架~
不過可以更加溶入到當地文化,見識左好多特別既細節,
比如原本東京既父母都好年輕,唔似香港好多人三十幾歲先生仔,
動物園內見到好多潮媽潮爸帶住兩三個小朋友黎玩,望落去似廿幾歲JA!

Day 3 - 上野

原定既行程呢,離開上野動物園之後會去秋葉源,
但係經過大半日無間斷既步行之後,身體卻很誠實,雙腳已經唔屬於我喇,
我地重臨『上野恩賜公園』稍作休息再決定去路,
沿住『不忍池』行左五分鐘先搵到位坐低。

五時多既東京又開始入黑同埋轉冷喇,
望住不忍池上面既鵝仔船及鴨仔,加埋少少既紅葉,心情又再放鬆



經過一輪冇氣冇力既討論之後,我地決定取消秋葉源既行程,
改為留守上野買手信及晚餐,然後就番酒店休息,保留體力明天大戰Mother Farm!

買完手信之後,開始搵食喇,
其實之前已經食過壽司同拉麵,今餐想搵D地道但又未食過既野,
行左好耐,兜左幾個圈,終於俾我搵到呢間餐廳有賣我既目標喇!而且好味之餘又好平呢!
但係,點解得咁少人幫襯既?而且多數都係上左年紀既日本人,
唔通呢種套餐已經唔興!?

2011年11月2日 星期三

2011.第三新東京紅葉初盛PLUS草泥馬微笑之旅.Day 2

2011.第三新東京紅葉初盛PLUS草泥馬微笑之旅.Day 2


點解我會叫箱根做第三東京,事緣係根據《新世紀福音戰士》劇情,

當而家既東京毀滅左之後,箱根將會係第三個新東京,
亦都係因為咁,箱根有好多手信都同《新世紀福音戰士》有關,真係有心思!

黎到Day 2,因為要趕8:40既浪漫特急去箱根,我地7:00就起身趕出門口!
估唔到去到新宿西口時間尚早,可以食個拉麵做早餐,暖暖肚子。
呢架就係我地坐既舊式特急車喇,係冇展望席架!


到達箱根湯本之後,我地採取逆流方式既行程,
即係先坐巴士去『元箱根港』,再上番大涌谷、強羅、箱根湯本,
所以當巴士到達『元箱根』時遊客唔算多,靜靜咁係湖邊欣賞紅葉及富士山景色!



沿住偉大既杉道往『箱根町港』方向行,身邊好多幾百歲既大樹,感覺非常relax!

一路行大概二十分鐘就到達箱根恩賜公園,可惜時間唔多,所以唔可以仔細咁行哂~


Day 2 箱根 - 海賊船

再行多十分鐘,終於都到達『箱根町港』碼頭,準備坐好有氣勢既海賊船,
當遠遠見到架船已經好興奮啦,估唔到係咁高咁有型架!


面對初紅既山葉同埋咁大既湖,呢個旅遊區令人印象好難忘,
當船開到去『桃源台』時,真係唔捨得離開湖區呀...

落左船之後,我地就轉坐吊車上山,望住山下既紅葉同埋遠遠既富士山,
心裡面湧起唔想再番香港對住電腦工作既念頭,但當然冇辦法實現啦...


大概十五分鐘,吊車就下面就出現左好多蒸氣,到達著名既溫泉區『大涌谷』喇!

Day 2 箱根 - 大涌谷


雖然箱根吊車係來住桃源台同早雲山,
不過因為一早已經計劃左會係大涌谷既『極樂荼室』食午飯,
所以我地就中沿落車醫肚啦!
老實講餐廳食物唔算得非常好食,不過窗外既風景非常靚!


除左食野之外,大涌谷有好多手信店可以逛,
呢到最出名既就係『黑蛋』!!不過『黑蛋』都有分兩款架~
一種係半生熟既,建議即場食用;另外仲有D係全熟既,一袋有五隻,可以當手信


因為我地19:00就要離開箱根,而時間已經去到14:30喇,
時間唔多,所以只可以淺行大涌谷,而唔可以沿路行上山欣賞風景,
期待下次可以多留幾日,慢慢多次啦


紅葉未完全盛放,不過沿路都見到唔少開始變紅既葉子


Day 2 箱根 - 早雲山->強羅->小王子博物館

再次踏上吊車,就係由箱根最高點大涌谷出發到早雲山吊車總站喇!
到左早雲山之後要再次轉纜車到強羅,然後再轉巴士到『小王子博物館』,
當到達強羅已經開始日落喇,原來已經四點幾...
由於『小王子博物館』17:00已經唔可以入場,加上要趕19:00番到『箱根湯本』,
所以呢程車真係等得好心急,而且一度想放棄唔去喇,
好彩冇衝動做錯事,一入到去博物館就覺得轉咁多程車再加1400YEN既入場費都係抵架!

由於太心急入館,唔記得左影門口既靚景,所以遊記一開始已經係館入面啦!
『小王子博物館』分為外景及內館,
戶外有好多個靚景俾你瘋狂影相,包括有大花園、教堂、歐洲大街等等



行左一陣見到有個門口可以入室內,我地就開始內館既旅程喇,
內館主要係介紹《小王子》既故事及歷史同埋作者生平,
如果你係曾經被《小王子》故事感動,你會係呢個館搵到好多溫暖既感覺;
不過未睇過《小王子》既都唔緊要,因為館內擺設及裝飾都非常靚同有氣氛架!



當再次出館既時候,天已經黑左八成喇,不過『小王子博物館』仲未完結~

Day 2 箱根 - 小王子博物館 - 新宿

當逛完『小王子博物館』內館出番戶外後,
第一個感覺係:好凍呀!
十月尾入黑後既箱根氣氛大概同香港最凍既時候差唔多,
不過我既注意力好快就俾眼前既畫面震撼住,唔記得哂有幾凍,
博物館既終點,竟然係一個遍地星光既花園及聖誕樹(!?),



可惜因為要趕巴士番強羅,唔可以再係博物館留多陣,
經過小王子精品店之後就到達博物館出口,
估唔到咁岩到有車喎,追完上左車先醒起冇係門口影張相留念...

坐巴士番到強羅之後,就轉小火車落山去箱根湯本準備回程喇,
我地真係好唔捨得箱根呀,一個咁靚既地方,而且仲保育得好好,
不期然會感慨點解香港只係識得拆走有旅遊價值既景點去起商場?
希望下次再黎箱根,風景可以繼續咁靚啦!


我地就係坐呢架特急番新宿架喇,之前特登上網訂左展望席第一行架~
雖然天黑左,不過周圍既景色都幾特別!

終於21:00番到新宿,晚餐係思憶之橫丁既『若月』拉麵,仍然係又平又好食。
Day 2完成啦,Day 3係築地加上野遊,我會再繼續努力更新,
請大家多多支持,留句言啦

2011年11月1日 星期二

2011.第三新東京紅葉初盛PLUS草泥馬微笑之旅

2011.第三新東京紅葉初盛PLUS草泥馬微笑之旅

2011.10月.27~31日東京之旅終於都完成啦!


正式詳細遊記之前,先簡介一下行程:
Day 1: 新宿、涉谷
Day 2: 箱根 (第三新東京)
Day 3: 告別築地、上野
Day 4: Mother Farm、池袋
Day 5: 新宿、機場

Day 1 - 新宿

今次旅行既起因係CX做飛撲日本機票大減價,
兩人來回東京連稅HK$5380,比起暑假時平超過50%呀!
所以成就左今次五天之旅喇!

第一日一早,我地就坐9:10分起飛既航班出發去東京,
係飛機上面睇左《醉爆伴郎團2》,然後再眠左一眠,
好開心飛機早左大半個鐘降落,令我地可以趕到14:48分既N'ex出新宿~

大概16:00出到新宿,落車第一個感覺係『好凍』!
事前我已經知道東京大概得十幾度,但係個陣寒風真係唔講得笑,
重新整理上身上衣物之後,我地立即趕去小田急中心買明天箱根之旅既周遊票,
雖然英語溝通上有少少困難,不過最後都好順利買到預訂左既展望席車票!

東京大概4:30就開始日落,隨著天色越來越暗,
我地之後就出發去搵小食醫肚喇,目標係『中村屋』既咖哩飽,
由於唔熟路,要兜左一陣先搵到所在位置,
可惜注定要失望喇...去到見到既,竟然係落左閘既『中村屋』,
門口有一堆日文聲明,雖然睇唔明白,不過重點就係冇得食...嗚


饑寒交迫加上失望之情,唯有寄望之後涉谷既豐富晚餐,
所以我忍住肚餓,出發去位於東新宿既『Hotel Sunroute Higashi Shinjuku』Check-in,
沿路經過日清杯麵公司,好有氣勢既一間公司呀!

大概行左廿分鐘左右,尚算順利搵到酒店,
我地完成Check-in後,就放低手頭上係行李,
係酒店樓下既東新宿站,坐『副都心線』出發去涉谷食野啦!

Day 1 - 涉谷 and 新宿

到達涉谷之後第一個mission就係搵食啦!
今餐係另一半帶路既,因為佢話之前同同事食過覺得好好味,
所以我就跟住佢係涉谷上斜落斜入酒店再轉出商場,
大概19:00去到一間叫『美登利』既日本餐廳門口啦,
見到餐廳門口有一條長長既人龍我已經面色一沉,
事關我當日除左係香港機場食左個唔太好食既早餐,已經全日冇野落過肚,
咁樣排法不知要何年何日先入到去食喇...
不過因為尊重另一半既心思,所以我都乖乖咁等,
好彩d人都食得好快,半個鐘先多d就入到去點餐啦!

『美登利』係一間叫壽司Set既餐廳,我點左個2190Yen既套餐,
除左壽司之外,套餐仲有蒸蛋及一個不知名既沙律,
由於好凍,所以我先食左個蒸蛋暖暖身先,唔~~都幾好味喎!
之後就開始食個其貌不揚既沙律喇,好猶豫咁食左一小口,
我就『哇』左聲,原來係蟹黃沙律呀,好香好新鮮!勁好食呀!!


之後既壽司呢...由於太肚餓啦,食完先醒起冇影相呀,哈哈,
食飽飽就出發行程啦,涉谷周圍行下,又入便利店買埋農場既門票,
沿路見到有UFO店(夾公仔店)就入去睇下,見到一款好想要既景品,
但係玩左500YEN都冇頭緒點樣先拎到,唯有放棄佢啦...
最後因為我地都唔喜歡shopping,所以行左陣就坐巴士回歸新宿喇!


意想不到返到新宿既行程係~~繼續夾公仔!
其實我對日本夾公仔好有好感,因為06年時,公仔係好容易就夾到,
個時UFO既抓真係可以夾得實D公仔架,大概玩500YEN就可以拎到獎品,
但係今次完全唔同哂,UFO抓完全係鬆架,
另一半睇中左一隻會行既HAPPY TREE FRDS公仔,試左3次(500YEN)都整唔郁佢,
我見其他日本人會係咁叫店員黎幫手,所以有樣學樣咁搵店員,
雖然聽唔明佢講乜,不過透過手勢都大概明白既,
又試左3次都冇反應,又再搵店員黎幫手,佢將公仔再放出少少,用手勢再教我地,
我地再入錢去試,可惜仍然失敗,
店員黎到見到咁既情況,發現之前教錯左我地,今次將隻公仔放到一定跌既位置,
玩多2次之後,呢隻價值連城既公仔終於都拎到手啦!


 夾完公仔之後,我地一路行番酒店,一路檢討點樣可以容易D拎到公仔,
發現唯一既方法係,每夾一兩次就搵店員幫手,如果唔係,根本就冇可能靠自己夾到!

Day 1行程結束,期待Day 2 第三東京(箱根)之旅!